मन्त्रिपरिषदका निर्णय हप्तामा २ दिन बिदा

सरकारले पेट्रोलिम आपूर्तिमा असहजता उत्पन्न भएको भन्दै सरकारी कार्यालय तथा सम्पूर्ण शैक्षिक संस्थामा हप्तामा दुई दिन बिदा दिने निर्णय गरेको छ ।

आज प्रधानमन्त्री तथा मन्त्रिपरिषदको कार्यालयमा बसेको बैठकले भोलिदेखि नै लागु हुने गरी सरकारी कार्यालय तथा शैक्षिक संस्थामा शनिबार र आइतबार साप्ताहिक बिदा दिने निर्णय गरेको हो ।

बैठकपछि सरकारका प्रवक्ता सस्मित पोखरेलले भने– पेट्रोलियम आपूर्तिमा उत्पन्न असहजताका कारण २०८२ चैत २३ गतेबाट लागु हुने गरी सरकारी कार्यालय तथा सम्पूर्ण शैक्षिक संस्थामा शनिबार र आइतबार दुई दिन बिदा दिने तथा शैक्षिक संस्थाबाहेक उल्लेखित कार्यालयको समय ९ देखि ५ बजे कायम गर्ने ।’

योसँगै अब सबै कार्यालय बिहान ९ बजे खुल्ने छन् भने अपरान्ह ५ बजे बन्द हुने छन् ।

त्यस्तै बैठकले आगामी शैक्षिक सत्र २०८३ वैशाख १५ गतेबाट सुरु गर्ने निर्णय गरेको छ ।

मन्त्री पोखरेलले ‘डिजिटल नेपाल ट्रान्फरमेसन प्रोजेक्ट’का लागि एसियाली विकास बैंकबाट प्राप्त ४० मिलियन अमेरिकी डलर र विश्व बैंकबाट प्राप्त ५० मिलियन डलर गरी ९० मिलियन अमेरिकी डलर सहुलियत ऋण स्वीकार गर्ने निर्णय गरेको पनि जानकारी दिए ।

त्यसैगरी दिगो र समावेशी वित्त परियोजना विश्व बैंकबाट ९५ मिलियन डलर ऋण सहयोग स्वीकार गर्ने निर्णय पनि गरेको छ ।

बैठकले नेपाल सरकारका सबै मन्त्रालय, सचिवालय र आयोग अन्तर्गतका निकायहरुको संगठन तथा व्यवस्था सर्वेक्षण गर्न संघीय मामिला तथा सामान्य प्रशासन मन्त्रालयलाई पूर्वस्वीकृत दिने निर्णय गरेको छ ।

त्यसैगरी डिजेल तथा पेट्रोल गाडीलाई विद्युतीय गाडीमा परिवर्तन गर्न आवश्यक कानुनी व्यवस्था मिलाउने निर्णय गरेको पनि पनि मन्त्री पोखरेलले जानकारी दिए । बैठकले राष्ट्रिय समाचार समितिका अध्यक्ष धर्मेन्द्र झाले पदबाट दिएको राजीनामा पनि स्वीकृत गरेको छ ।